مفتتح:
"يا بياعين حلمي
جملة وقطاعي
الحلم مش حلمكم
الحلم دا بتاعي
من باي ودراعي".
القصيدة:
سِن القلم خط الحروف
رسموا على صدرك خريطة للوطن
دم الكفوف كان ع الكفن
اسمك طريق معروف شق العفن
الشمس كانت في السما ميالة
وبزهوة الخيالة
قالت سناء عايزه عريس
طوله وطن
عرضه وطن
عايزه عريس
النيل عيونه والفرات
وشفايفه من أرض اليمن
كل البنات عايزه عريس إلا أنا
عايزه عريس
لبنان خدوده والجنوب نبض القلوب
واتزوقت فستان فرح
عودها النحيل طاب ع الوتر عازف
يا دمنا النازف
عودها اللي كان عارف
إن الوطن مكسور
لبست ملابس عرسها في النور
دقوا الطبول
طلعت سناء متزوقه
بسمتها كات عرض الوطن
زهران صرخ ع المشنقة
يا اهل الرسول
هاتوا بنات الحور
زفوا العروسة للعريس
اليوم دا يوم الملتقى
واستنظرت إن العريس يجي
سليمان لبس توبه
وأيمن مسك إيدي
يا فرحتي يا عيدي
نطق السلاح زيدي
مدي الخطاوي يا سناء مدي
الأرض دي أرضي
والعرض دا عرضي
وصومي واتوضي
عدي العيال عدي
وعلميهم رقصة الخيالة
ارض العرب حياله
ولدت كتير خيالة
وانتي اللي بتعدي